പ്രവാസികളുടെ പ്രശ്നങ്ങൾക്ക് പരിഹാരം ലക്ഷ്യം; ഇന്ത്യൻ അംബാസഡറുമായി കൂടിക്കാഴ്ച നടത്തി പ്രവാസി ലീഗൽ സെൽ

ഒമാനിലെ ഇന്ത്യൻ പ്രവാസി സമൂഹത്തിന്റെ ക്ഷേമം, അവകാശങ്ങൾ, സുരക്ഷ എന്നിവയുമായി ബന്ധപ്പെട്ട വിവിധ വിഷയങ്ങൾ ചർച്ച ചെയ്യുന്നതിനായി പ്രവാസി ലീഗൽ സെൽ ഒമാൻ ചാപ്റ്റർ പ്രതിനിധി സംഘം ഇന്ത്യൻ അംബാസഡർ ഹിസ് എക്സലൻസി പ്രശാന്ത് പിസെയുമായി കൂടിക്കാഴ്ച നടത്തി. ഒമാനിലെ ഇന്ത്യൻ പ്രവാസികൾ നേരിടുന്ന വിവിധ പ്രായോഗിക ബുദ്ധിമുട്ടുകൾക്ക് ഫലപ്രദമായ പരിഹാരം കണ്ടെത്തുക എന്ന ലക്ഷ്യത്തോടെയായിരുന്നു ഈ സന്ദർശനം. പ്രവാസി ലീഗൽ സെൽ ഒമാൻ ചാപ്റ്റർ പ്രസിഡന്റ് അഡ്വ. ജെസ്സി ജോസ്, കോർഡിനേറ്റർ രാജേഷ് കുമാർ, ട്രഷറർ നൂറുദ്ദീൻ, ജോയിന്റ് സെക്രട്ടറി ബാലകൃഷ്ണൻ വലിയാട്ട് എന്നിവരടങ്ങുന്ന സംഘമാണ് അംബാസഡറെ സന്ദർശിച്ചത്.

തൊഴിൽ സംബന്ധമായ പരാതികൾ, പ്രവാസികൾക്കുള്ള നിയമസഹായം, തൊഴിൽ തർക്കങ്ങൾ, ശമ്പള കുടിശിക, രേഖകളുമായി ബന്ധപ്പെട്ട പ്രശ്നങ്ങൾ, അടിയന്തര സാഹചര്യങ്ങളിലെ കോൺസുലർ സഹായം എന്നിവയുൾപ്പെടെയുള്ള നിർണായക വിഷയങ്ങൾ പ്രതിനിധി സംഘം അംബാസഡറുടെ ശ്രദ്ധയിൽപ്പെടുത്തി. പ്രവാസികളുടെ പ്രശ്നങ്ങളിൽ സമയോചിതമായ ഇടപെടൽ ഉറപ്പാക്കുന്നതിനും അവയ്ക്ക് വേഗത്തിൽ പരിഹാരം കണ്ടെത്തുന്നതിനുമായി ഇന്ത്യൻ എംബസിയും സാമൂഹിക സംഘടനകളും തമ്മിലുള്ള സഹകരണം കൂടുതൽ ശക്തിപ്പെടുത്തേണ്ടതിന്റെ പ്രാധാന്യവും ചർച്ചയിൽ ഉയർന്നുവന്നു.

ഇന്ത്യൻ സമൂഹത്തിന്റെ ക്ഷേമത്തിനായി എംബസി നിലവിൽ നടപ്പിലാക്കി വരുന്ന വിവിധ സേവനങ്ങൾക്കും ക്ഷേമപദ്ധതികൾക്കും പ്രതിനിധി സംഘം നന്ദി രേഖപ്പെടുത്തി. ഒമാനിലെ ഇന്ത്യൻ പൗരന്മാരുടെ അവകാശങ്ങളും താൽപര്യങ്ങളും സംരക്ഷിക്കുന്നതിൽ എംബസിയുടെ ഭാഗത്തുനിന്ന് തുടർന്നും ശക്തമായ പിന്തുണയുണ്ടാകുമെന്ന് അംബാസഡർ പ്രതിനിധികൾക്ക് ഉറപ്പുനൽകി.

പ്രവാസികളുടെ പ്രശ്നങ്ങൾ ബന്ധപ്പെട്ട അധികാരികളുടെ ശ്രദ്ധയിൽപ്പെടുത്തി ശാശ്വത പരിഹാരം ഉറപ്പാക്കാൻ ഒമാൻ ചാപ്റ്റർ നിരന്തരം പ്രവർത്തിക്കുമെന്ന് ഭാരവാഹികൾ വ്യക്തമാക്കി. വരും ദിവസങ്ങളിലും നിയമ ബോധവത്ക്കരണം, അഭിഭാഷക പിന്തുണ, മറ്റ് മാനുഷിക സേവനങ്ങൾ എന്നിവയിലൂടെ ഇന്ത്യൻ പ്രവാസി സമൂഹത്തെ സഹായിക്കാനും ശക്തിപ്പെടുത്താനുമുള്ള ദൗത്യവുമായി മുന്നോട്ടുപോകുമെന്നും പ്രവാസി ലീഗൽ സെൽ അറിയിച്ചു.

Content Highlights: Representatives of the Pravasi Legal Cell met the Indian Ambassador to discuss key issues faced by expatriates and explore solutions aimed at improving legal support and welfare services for overseas Indians.